तपशील

ऑगस्ट २०२५:- दिपावली निमित्त मु. शिंगेवाडी, ता. माढा, जिल्हा सोलापूर येथे पुराने बाधित ग्रामस्थांसाठी मदत उपक्रम राबविण्यात आला.

शिवसंस्कृती ट्रस्टमार्फत दिपावली निमित्त मु. शिंगेवाडी, ता. माढा, जिल्हा सोलापूर येथे पुराने बाधित ग्रामस्थांसाठी मदत उपक्रम राबविण्यात आला. या उपक्रमामध्ये शिंगेवाडी तसेच आसपासच्या गावातील पूर परिस्थितीमुळे बाधित शेतकरी बांधव तसेच मोलमजुरी करणाऱ्या हातावर पोट असलेल्या ग्रामस्थांसाठी दिवाळी निमित्त मदत म्हणून घरातील वापराची स्टीलची भांडी, ताट, वाट्या, प्लास्टिक बरण्या तसेच घरगुती वापरातील इतर वस्तू मदत म्हणून पुरविण्यात आल्या. या उपक्रमामध्ये ट्रस्टचे दिवंगत सदस्य कै. संतोष भाबड यांच्या स्मरणार्थ गावातील गरजू मुलांसाठी वही, कंपास, पेन, पेन्सिल, पट्टी इत्यादी शैक्षणिक साहित्य आणि खाऊ वाटप करण्यात आला. सोबतच ट्रस्टच्या सदस्या सौ. अनिता सचिन माने यांच्या सहकार्याने महिलांना साड्यांचे वाटप करण्यात आले. ग्रामस्थांनी गावामध्ये आलेल्या महाभयंकर पूर परिस्थितीमध्ये त्यांना तोंड द्यावे लागलेल्या जीवघेण्या अडचणींबद्दल माहिती दिली, यावेळी ग्रामस्थांचे डोळे पानावले होते. उपक्रमाच्या शेवटी समस्त ग्रामस्थांनी शिवसंस्कृती ट्रस्टच्या सर्व हितचिंतक आणि देणगीदारांच्या सहकार्यामुळे या गावातील पुराने बाधित ग्रामस्थांना, विद्यार्थ्यांना तसेच महिलांना मदत देऊन दिलासा दिल्याबद्दल शिवसंस्कृती ट्रस्ट आणि मदत केलेल्या सर्व देणगीदारांचे आभार मानले. येथील ग्रामस्थांना पुरवण्यात आलेल्या मदतीमुळे त्यांनी व्यक्त केलेल्या भावना आणि त्यांच्या चेहऱ्यावरील आनंदाश्रु पाहून नक्कीच ट्रस्टच्या सर्व देणगीदारांच्या माध्यमातून त्यांना पुरविलेली मदत सार्थकी लागल्याचा अनुभव आला. या उपक्रमासाठी माढा तसेच शिंगेवाडी येथील श्री. हर्षल वाघमारे दादा आणि श्री विठ्ठल सोलवणे दादा यांचे मोलाचे सहकार्य लाभले. या उपक्रमावेळी ट्रस्टचे सदस्य महेश कल्याणी, सागर शिर्के, सौ. अनिता सचिन माने आणि श्री. सचिन माने हे उपस्थित होते.